ក្រុងម៉ូស្គូ៖ យោងតាមប្រព័ន្ធផ្សព្វផ្សាយរុស្ស៊ី យ៉ាងហោចណាស់មនុស្ស ៦០នាក់បានស្លាប់ និងជាង ១០០នាក់បានរងរបួស (ចំនួននឹងកើនឡើង) នៅក្នុង «ការវាយប្រហារភេរវកម្ម» នៅសាលប្រគុំតន្ត្រី ក្នុងCrocus City Hall ភាគពាយព្យនៃទីក្រុងមូស្គូ។
យោងតាមវីដេអូដែលបានបង្ហោះក្នុងបណ្តាញសង្គម ខ្មាន់កាំភ្លើងប្រដាប់ដោយអាវុធធុនធ្ងន់បានទម្លុះចូលទៅក្នុងមជ្ឈមណ្ឌលផ្សារទំនើប Crocus City Hall និងកន្លែងប្រគុំតន្ត្រីដ៏ល្បីល្បាញ ហើយបានចាប់ផ្តើមបាញ់ប្រហារដោយមិនលើកឡើងលើមនុស្សដែលមានវត្តមាននៅទីនោះ។
ប្រភពព័ត៌មានបានឱ្យដឹងថា ខ្មាន់កាំភ្លើងបានសម្រុកចូលបើកការបាញ់ប្រហារ លើអ្នកចូលរួមការប្រគុំតន្រ្តី របស់ក្រុមចម្រៀងរ៉ុកជើងចាស់ Picnic ដោយបានបាញ់រះទៅលើហ្វូងមនុស្សនិងបំផ្ទុះគ្រាប់បែកដែលធ្វើឱ្យ១/៣នៃអគារបានឆាបឆេះ។
សាក្សីម្នាក់បាននិយាយថា ការប្រគុំតន្ត្រីទើបតែបានចាប់ផ្តើម ស្រាប់តែមានសម្លេងផ្ទុះចេញពីគ្រាប់បែកផ្សែង ហើយម្នាក់ៗភ័យស្លន់ស្លោរត់ចេញពីកន្លែងអង្គុយ ហើយក្រុមខ្មាន់កាំភ្លើងបាញ់រះតែម្តង។ សាក្សីបន្តថា ម្នាក់ៗបានព្យាយាមទម្លុះបង្អួចដើម្បីគេចពីកន្លែងបាញ់ប្រហារ។ ចំនួនអ្នកស្លាប់ត្រូវបានគេរំពឹងថានឹងកើនឡើងដោយសារទំហំនៃការវាយប្រហារ និងភ្លើងដែលបានឆាបឆេះផ្សារទំនើបនេះ។
Crocus City Hall ដែលជាផ្សារទំនើបធំមួយ និងកន្លែងតន្ត្រីនៅភាគពាយព្យនៃរដ្ឋធានីរុស្ស៊ី។
ការបាញ់ប្រហារនេះ ត្រូវបានរដ្ឋាភិបាលរុស្សី ថាជាអំពើភេរវកម្ម ហើយក្រុមភេរវករ ISIS ក៏បានចេញមុខទទួលខុសត្រូវលើករណីនេះផងដែរ៕
